MSPC XIV - “Word of God in Mindanao: Creation and Peace”

Ni Erdman Pandero

Digos City, Philippines – 213 ka mga deligado gikan sa nagkalain-laing mga diyosesis ug arkidiyosesis sa pulo sa Mindanao ug Sulu ang mitambong sa ika-14 nga Mindanao-Sulu Pastoral Conference (MSPC) nga gipahigayon niadtong Oktubre 18 – 22, 2010 sa Crisbel Crown Center dakbayan sa Digos.

Ang MSPC usa ka panagtigum sa mga Obispo, Kaparian, Kamadrehan ug mga Laygo nga nahisakop sa pulo sa Mindanao ug sa Sulu. Ang unang MSPC nahitabo niadtong Nobyembre 17 – 21, 1971 didto sa Arkidiyosesis sa Davao. Ang MSPC mahitabo kausa sulod sa tulo ka tuig.

Ang atong Arkidiyosesis sa Cagayan de Oro nagpadala og napulo ka opisyal nga mga deligado nga gipangulohan ni Msgr. Columbus Villamil, SSJV (Vicar-General). Uban kaniya mao sila si Fr. Florencio Salvador, SSJV, SLD, (Vicar-Genereal), Fr. Perseus Cabunoc, SSJV (Ad Intra Ministry), Fr. Nathan Lerio, SSJV (Ad Extra Ministry), Fr. Eddie Magtrayo, SSJV (Catechetics), Fr. Roy Barros, SSJV (BEC), Fr. Butch Zayas (SJVTS Vice-Rector), Sr. Mary Anne Padilla, FSP (Social Com), Ms. Myrna Siose (ACCESS), Ms. Ann Pielago (All-NFP), ug Mr. Benny Sy (Alpha, BEC). Si Sr. Padilla wala nakatambong hinuon gipulihan siya ni Bro. Erdman Pandero (Vice-Chancellor).

Ang tema sa ika-14 nga MSPC Word of God in Mindanao: Creation and Peace. Giablihan ang maong kumperensya sa usa ka Santos nga Misa nga gipangulohan sa atong talahuron nga Apostolic Nuncio to the Philippines Archbishop Edward Joseph Adams. Sa iyang maanindot ug lawom nga homiliya, iyang gidapit ug gipahinumduman ang mga kaparian nga ang Pulong Sa Dios nga kanunay gibasa ug gisaulog diha sa Santos nga Misa mamahimo untang buhi diha sa kinabuhi sa mga kaparian.

Ang 21 ka mga Obispo, 71 ka mga kaparian, 3 ka mga relihiyosong lalaki, 25 ka mga madre, ug 93 ka mga laygo maiiniton nga gidawat ug gihatagan og luna nga kapapahulayan sa mga foster families. Sulod sa tulo ka adlaw, ang mga deligado masubsob nga namalandong mahitungod sa (1) Pulong sa Dios, (2) ang Kabuhatan ug Kinaiyahan, (3) ug Kalinaw. Gibahin sila ngadto sa 16 ka mga grupo ug uban sa ilang pinili nang daan nga facilitators, ilang gipadayag ang ilang mga pamalandong ug mga kasinatian. Aduna usab Plenary Session ug Synthesis sa matag adlaw.

Usa sa mga maanindot nga punto nga gihatag ni Bishop Romulo T. dela Cruz, DD mahitungod sa Pulong sa Dios mao nga ang Pulong sa Dios Buhi. Kini buhi tungod kay ang Pulong sa Dios adunay (1) tingog (voice), (2) hulagway (face), (3) balay (home), ug (4) nagpadala kanato ngadto sa misyon (sends us to mission). Ang Pulong sa Dios Buhi tungod kay adunay tingog nga nasinati diha sa creation story, sa mga propeta, ug sa mga sulugoon sa Dios, adunay hulagway diha sa atong Ginoong Jesukristo, adunay balay diha sa mga katilingban sa mga matuohon, ug nagpadala sa misyon ngadto sa mga pamilya ug katilingban.

Sa pagtapos sa MSPC XIV, nauyonan sa mga deligado nga ang sunod nga MSPC nga mahitabo sa tuig 2013 pagahimoon sa Arkidiyosesis sa Zamboanga.