Ni Jan Crispin Adrian O. Rayon
Nagkatigum-tigum pag-usab ang mga seminarista sa diyosesis sa Cagayan de Oro, Butuan, Surigao, Tandag ug Malaybalay alang sa ika-lima nga Cagayan, Butuan, Surigao, Tandag, Malaybalay (CABUSTAM) Inter-Diocesan College Seminary Assembly nga nahitabo niadtong Oktubre 15 - 17, 2010 sa San Jose de Mindanao Seminary, Camaman-an, ubos sa tema, “The Call to Nurture the Encounter of the Sacred in the Human Experience Thru Prayer.”
Dako ang kalipay ni Rev. Fr. Othelo Polinar, SSJV, rector sa San Jose de Mindanao Seminary (SJMS) nga mao ang pinaka-una nga nagpasiugda sa tinuig nga kalihukan upat na katuig ang milabay. Sa iyang mensahe, miingon siya “it’s good to be back here, where we all started this assembly…” Ang SJMS ang pinaka-una nga nagdumala sa CABUSTAM Assembly niadtong tuig 2006, ang Golden Anniversary sa SJMS. Gisundan dayon kini pagdumala sa Bukidnon (2007), Surigao(2008) ug Butuan (2009).
Ang unang parte sa kalihukan mao ang makatandog nga pakigpulong ni Rev. Fr. Raul Dael, SSJV sa SJMS chapel. Sa iyang pakigpulong, gipunting niya ang kamahinungdanon sa pag-ampo ilabi na gayod nga ang mga seminarista ang mamahimong mga pari ugma damlag. Gisundan kini sa Santos nga Misa nga gipangulohan ni Rev. Fr. Othelo Polinar, SSJV kauban ang mga seminary fathers sa nagkadaiyang seminary sa CABUSTAM Region. Bibo usab kaayo ang mga participante sa assembliya nga bisag nibundak ang kusog nga ulan ug napalong ang kuryente sa ikaduhang hugna kamulo ang programa, wala gihapon magpapugong ang mga seminarista sa pagpasiklab sa ilang mga talento sa pag-awit ug pagsayaw sa gipahigayon nga Choral Contest ug Interpretative Dance Contest. Naangkon sa St. Peter College Seminary ang unang gantimpala sa Choral contest ug ang San Jose de Mindanao Seminary ang nakakuha sa unang gantimpla sa Interpretative Dance Contest.
Sa ikaduhang adlaw sa panagtigum, gipangulohan ni Most Rev. Fr. Antonio Ledesma, SJ, DD ang Santos nga Misa. Gipunting sa Obispo ang pagtimbang-timbang sa mga prioridad sa kinabuhi isip mga umaabot nga mga pari ugma damlag. Wala usab nawala ang tradiyonal nga sportsfest nga didto gihimo sa Kong Hua High School, Kauswagan. Naangkon sa St. Peter College Seminary ang over-all champion sa Sports fest.
Kapin sa gatos ang mitambong sa gipahigayon nga assembliya. Otsentay sais (86) ka seminarista ang mitambong gikan sa St. Peter’s College Seminary-Butuan (23 kanila gikan sa Tandag Diocese), singkwentay tres (53) ang gikan sa Pope John XXIII College Seminary-Malaybalay, trantay otso (38) gikan sa Maradjao Magbalantay College Seminary-Surigao City ug adunay sitentay siete (77) ka mga seminarista ang gikan sa San Jose de Mindanao Seminary-Cagayan de Oro (18 kanila gikan sa Tandag Diocese).
“Malipayon kaayo ko sa asembliya…Nadasig ko pag-ayo nga magpadayon sa akong bokasyon”, miingon si Mark Tiu, usa sa mga seminarista gikan sa diyosesis sa Surigao nga mitambong sa gipahigayon nga panagtigom. Excited napud ang tanan sa sunod nga CABUSTAM assembly nga pagahimoon didto sa Malaybalay, Bukidnon sunod tuig. Kining tanan gihimo alang sa kalamboan sa bokasyon ug sa paglig-on sa communal life sa mga seminarista sa CABUSTAM.
No comments:
Post a Comment