Kaparian sa CDO mikondenar sa kahugaw nga gihimo sa piniliay

Ni Mark Harvey Elloren

Mga 25 ka kaparian sa Arkdiyosesis sa Cagayan de Oro mipirma sa usa ka Pahayag pagkondenar sa kahugaw nga gihimo panahon sa piniliay diin ang mga “paraphernalia” niini nakit-an sa Ramirez Junkshop sa Barangay Puntod. Ang lokal sa COMELEC miingon nga ang nakit-ang mga kabtangan sa eleksyon mao ang nangawala sa ilang opisina.

Ang 25 nga mga pari mao sila si: Fr. Nathan C. Lerio, Fr. Remel O. Mag-usara, Msgr. Rey Monsanto, Fr. Ronald Ledesma, Fr. Neil B. Limbaco, Fr. Alex Borres, Fr. Amie P. Balacuit, Fr. Julito S. Cabactulan, Fr. Perseus P. Cabunoc, Fr. Raul B. Dael, Fr. Joel Oga, Fr. Raul G. Sesante, Fr. Ruel M. Binaisan, Fr. Allan Chabit, Fr. Raoul Magracia, Fr. Wilson Legaspi, Fr. Lyndon G. Zayas, Msgr. Tex Legitimas, Fr. Reno Alima, Fr. Ricardo A. Dancela, Fr. Rene D. Soldevilla, Fr. Joseph Schwegmann, Msgr. Abelardo S. Cabillan, Fr. Gil Escalante, ug si Fr. Ricardo A. Pagatpatan.

Isip mga pangulo sa Parish pastoral Council for Responsible Voting (PPCRV) sa nagkalain-laing mga parokya, ang mga kaparian mipakusog sa ilang buhat sa pagbantay sa moralidad sa pagpangita sa kamatuoran. Ila usab gipatawag ug gidapit ang lokal sa City Police ug uban pang mga ahensya sa pagduso sa ilang kaugalingong kusog aron mahibaw-an ang kamatuoran sa nahitabo. Sila usab nangusog sa pagpangayo sa usa sa ka tinuod nga pag-imbestigar aron madakpan ang mga naghimo niini sa madali nga panahon.

Kinasingkasing usab nilang gihangyo ang national COMELEC nga mahukman na ang mga panghitabo. Ang ilang gipahayag miingon, “Kung kinahanglanon, ipapahawa ang mga lokal sa COMELEC tungod sa ilang wala pagbuhat sa ilang responsibilidad isip opisyal sa gobyerno.” Ila usab nga gihangyo ang uban pang mga grupo sa paghimog mga lakang kabahin niini.

Hinoon, ilang gihangyo ang lokal COMELEC sa pag kooperar sa gihimo nga imbestigasyon aron dili sila ma-markahang ‘partisan’. Kinasingkasing usab sila nga mihangyo sa mga ‘media’ sa pagtaho sa kamatuoran ug dili sila maglalisay ug hinoon maghiusa sa pagpangita sa kamatuoran. Mihangyo usab sila sa mga partidong politikal nga padayonon sa COMELEC ug PPCRV ang pag-kooperar sa nagpadayong imbestigasyon ug mohulat sa resulta niini nga dili mohimog mga lakang nga makasamot sa kagubot.

Sa katapusan, mihangyo sila sa publiko sa pagpadayon sa ilang pagkamalinawon ug magpadayon sa ilang pag-ampo sa Dios alang sa paggiya sa mga nag-imbestigar nga mga ahensya alang sa kamatuoran. Ang ubang mga kabtangan sa elekston gipadala sa PPCRV Manila alang sa dugang imbestigasyon human niadtong gihimong inbentaryo sa Mayo 19, 2010. Ang ubang kabtangan, sama sa flash (cf) cards, gipatagoan sa mahal nga Arsobispo Antonio J, Ledesma.