Diyosesis sa Malaybalay mainitong midawat sa bag-ong obispo

Bp. Jose Cabantan during the greetings from the diocesan clergy of Malaybalay during his Canonical Installation. Inset: The newly-installed bishop officially occupies the episcopal chair of Malaybalay. (Photo by Aye Navarro)

Ni Maris Stela Camaddo

Si Most Rev. Jose Araneta Cabantan, D.D nilingkod na sa pangatungdanan isip  bag-ong obispo sa Diyosesis sa Malaybalay pinaagi sa usa ka seremonyas diha  sa Santos nga Eukaristiya nga gisaulog  sa Katedral ni San Isidro Labrador, Malaybalay niadtong May 15, 2010, ang piyesta sa santos nga patron sa maong lugar.

Ang seremonyas  gitambungan  sa mga  Obispo  nga mao sila si Most Rev. Antonieto  D. Cabahug, D.D. sa diyosesis sa Surigao, Most Rev. Elenito R. Galido, D.D. sa  Iligan, ang presidente sa CBCP nga mao si Most Rev. Nerio P. Odchimar,  D.D., Obispo sa Tandag, si Most Rev. Honesto C. Pacana, D.D., ang Obispo Emeritus sa diyosesis sa Malaybalay, ug si Most Rev. Antonio J. Ledesma, D.D.  ang Arsobispo sa Arkidiyosesis sa Cagayan de Oro, diin nagagikan ang bag-ong Obispo.

Sa iyang homiliya, si Obispo Emeritus Honesto C.  Pacana D.D. mipasalamat sa tanang mga miduyog sa pag-abi-abi sa bag-ong obispo ug sa mga mitambong sa seremonyas sa paglingkod sa pangatungdanan ug sa pagsaulog sa Eyukaristiya. Matud pa niya nga ang pagtambong sa tanan sa mga kalihukan sa pagdawat, nagpakita sa pakighiusa sa tanan sa buluhaton sa simbahan.

Mainitong gitagbo si Bishop Cabantan sa Diyosesis sa Malaybalay niadtong buntag sa bisperas sa kapistahan ni San Isidro Labrador,  Mayo 14, 2010. Nag-linya ang mga salakyan nga naghatud kaniya gikan sa Cagayan de Oro paingon sa Malaybalay.

Usa usab ka mabulokong tulumanon ang gipasundayag sa mga taga Bukidnon alang sa bag-ong obispo nianang gabhiona.   Gitambungan kini sa mga opisyales sa siyudad sa Malaybalay, sa mga representante sa nagkalain-laing tulunghaan sa siyudad, sa mga kaparian,  kamadrehan ug mga laygo sa probinsiya.   Daghang  mga bisita gikan sa  siyudad sa Cagayan de Oro, ilabi na sa lungsod sa Lagonglong, Misamis Oriental, ang lungsod nga natawhan ug gidak-an sa bag-ong obispo.

Si Most Rev. Jose Araneta Cabantan, D.D gi-ordinahan isip Obispo niadtong petsa 30 sa Abril, 2010 ni Most Rev. Joseph Adams, DD, Apostolic Nuncio sa Pilipinas didto sa kaulohang katedral ni Senyor San Agustin sa Arkidiyosesis sa Cagayan de Oro.