48 ka mga katekista mitapos sa 2010 Catechetical Summer Classes

Ni Sr. Ma. Josie P. Alabado, TMM

Kwarenta’y otso ka mga partisipante gikan sa unom ka mga distrito sa arkidiyosesis ang nitapos sa 2010 Catechetical Summer Classes niadtong Abril 12 – Mayo 15 didto sa St. John Vianney Theological Seminary. Kining tinuig nga pag-umol sa mga katekista gipasiugdahan sa Archdiocesan Catechetical Ministry (ACM) sa Arkidiyosesis sa Cagayan de Oro.

Karong tuiga, gitutukan sa mga tigpasiugda ang pagtuon sa doktrina sa atong Simbahan nga mao ang Revelation and Faith, Holy Trinity, ug ang Catechetical Pedagogy. Kabahin sa pagtuon mao ang senemanang “Social night” aron paghatag kanila sa kahigayonan sa paglambo sa ilang mga talento sa pag-awit, pagsayaw ug pagdrama, ug usab gihimo ang “BEC groupings” nga anaa ang pagtinabangay ug pagsandurotay sa matag usa, uban sa katilingabanong pag-ampo, pagrosaryo ug “outing.”

Gitapos ang kalihukan sa usa ka integration pinaagi sa usa ka retreat nga gipahigayon ni John Dwight B. Pimentel.  Gitapos ang Catechetical Summer Classes pinaagi sa usa ka Misa nga gipangulohan ni Arsobispo Antonio J. Ledesma, SJ didto sa kapilya ni San Juan Maria Vianney sa 6:00 sa buntag diin gidawat usab sa matag katekista ang sertipiko, pagmatuod sa ilang pagtapos sa pag-umol sa mga katekista sa arkidiyosesis.    Ang Misa gitambungan usab sa ilang mga kabanay ug mga coordinators sa parokya.

Ang mitabang sa ilang pagtuon ug pag-umol mao sila si: Sem. Erdman Pandero – seminarista sa St. John Vianney nga bag-o lang nitapos sa iyang pagtuon sa teolohiya; Rev. Fr. Michael Christopher Fabello – Assistant Catechetical Director ug Parochial Vicar sa Mt. Carmel Parish, John Dwight  B. Pimentel – Campus Minister sa Xavier University; Sr. Tess Balberan, C.M. - Campus Minister sa Capitol University; Rev. Fr. Hawthorne Galas – Director sa Student Catholic Action ug Parochial Vicar sa St. Augustine Cathedral; Dr. Mila Napiere – Research and Development Planning sa Lourdes College, diin nitapos sa pagka katekista sa Mother of Life.