Unang panagtigum sa mga mag-uuma gipahigayon sa parokya sa Claveria

Sustainable Agriculture Ministry

Malampusong gipahigayon ang unang panagtigum sa mga mag-uuma sa arkidiyosesis niaadtong Octubre 29 ug 30 sa parokya sa Birhen sa Lourdes sa lungsod sa Claveria. Kiniing unang panagtigum midala sa tema, ‘Malahutayong Pag-panguma, Haum ug Tubag sa Nagka-usab Usab nga Panahon. Si Rev. Fr. Rene D. Soldevilla, ang pangulo sa Sustainable Agriculture Ministry (SAM) miulbo sa kalipay sa nakita nga mga mag-uuma, pangulo sa SAM ug Social Action Center (SAC) sa nagkalain-laing parokya nga mikabat menos o kulang sa usa ka gatos.

Sa maong panagtigum, gipakita ni Arsobispo Antonio Ledesma ang iyang dakong gugma sa mag-uuma diin siya usa sa mamumulong.
Ang mahal nga Obispo misangpit sa mga ka puntos sa ‘Espirituhanong Gabayan sa Kinabuhi’ sama sa: ang kinaiyahan gasa sa Dios; ang kinaiyahan alang sa kinatibuk-an nga kaayohan sa tanan; ang tanang katawhan responsable ug dunay kaakohan isip piniyalan sa Dios sa kinaiyahan; ug usab, ang kalambuan sa tawo nakahan-ay diha sa iyang pagtoo sa Dios.

Dinhi usab nga panagtigum, gipirmahan sa Claveria Technical Coordinating Committee (CTCC) ang ‘Memorandum of Understanding’diin ang tuyo mao ang paglantaw sa kalambuan sa ‘Pilot Project’ sa Arkidiyosesis nga gidala sa Sustainable Agriculture Ministry sa parokya sa Birhen sa Lourdes nga mao ang ‘Bridging Claveria Small Farmers to Jollibee Supply Chain.’ Kining proyekto nga gidamgo ni Arsobispo Ledesma nga alang sa mga mag-uuma sa Arkidiyosesis, maka pa-uswag sa ilang kinabuhi pinaagi sa pag-suplay ug mga abot ngadto sa Jollibee ug ang igsoon niining establisismo nga nag negosyo pinaagi sa “food chain.”

Ang unang panagtigum sa mag-uuma, gisuportahan sa; Department of Agriculture, Municipality of Claveria, Misamis Oriental State College of Agriculture and Technology (MOSCAT), World Agroforestry Centre (ICRAF), Landcare Foundation Philippines, Catholic Relief Services (CRS),  Our Lady of Lourdes Parish of Claveria, ug ang Archdiocese sa Cagayan de Oro, pinaagi sa Ad-Extra Ministry-Social Action Center. Kini usab ang hugpong nga milambigit sa Claveria Technical Coordinating Committee o (CTCC).

Ang mga pagtoon nga nakahatag ug dakong pag-laum sa mag-uuma nga gipakita sa panagtigum mao ang: “Integrated Pest Management ug Natural Farming Technology and System” nga gihatag nila ni G. Maagad ug G. de los Reyes sa Department of Agriculture; “Rice – Duck Farming’ ni Fr. Joel Lusat; ug ang ‘Onion Bulb Production for Jollibee’ nga gihatag ni G. Halasan sa Impasug-ong, Bukidnon ug sa iyang kauban sa CRS.

Sulod sa panagtigum, Gihan-ay ni Fr. Nathaniel Lerio, ang pangulo sa Ad-Extra Ministry-Social Action Center,  ang mga gidamgo sa mga mag-uuma sa ilang tagsa-tagsa ka parokya ug sa Distrito sa Simbahan diin usab nahasubay sa plano sa SAM ilabina ang pagmugna sa Demo Farm sa kada Distrito sa simbahan diin ang mga mag-uuma magtoon.

Gitapos ang panagtigum pinaagi sa pag-suroy, isip pag-toon sa Agro-Forestry Demo Farm sa MOSCAT, Barros’ Dairy Farm ug Mercado’s Farm.