Mga katekista iskolar sa Lourdes College

Ni Sr. Josie Alabado, TMM

Ang Arkidiyosesis sa Cagayan de Oro ug ang Archdiocesan Catechetical Ministry uban sa pagpaluyo sa Lourdes College nagkauyon sa paghimo ug usa ka programa ug kasabutan sa pag-umol sa mga katekista nga mamahimong professional catechists nga magtabang sa atong arkidiyosise. Kini nga programa gisugdan karong tuiga 2010 ug adunay kitay lima (5) ka mga batan-ong nga nakapulos niining maong programa nga nagagikan sa lima ka distrito: Balingasag, Camiguin City East, City West ug Initiao. Sila gitawag ug mga Catechists’ District scholars. Sila usab gibuligan sa mga kaparian sa matag distrito nga naga naka-amot sa ilang financial nga tabang. Kini sila nagkuha sa upat ka tuig nga kurso sa BS in Religious Formation. Gawas sa Academic formation, aduna usab silay Human and Spiritual Formation nga ipahigayon sa Archdiocese Catechetical Formation Team. Dili lang usab sila giumol aron mahimong hanas sa mga Doktrina sa atong pagtoo kondili mamahimo usab silang mamaayong mga katekista ug Kristiyanos. Sa pagkakaron tulo kanila nagpuyo sa Catechetical Center (former deacon’s formation house).

Mao kini ang tubag sa atong gipangandoy nga makabaton ug mga professional nga ketekista. Adunay daghan nga nagtinguha ug interesado sa maong program apan lima ra gayud ang nakuha human sa upat (4) ka screening nga gihimo. Mapasalamaton kita niini nga programa uban sa pagbulig sa atong talahurong Arsobispo Most Rev. Antonio J. Ledesma, S.J., D.D. nga maoy nagduso niini. Mapasalamaton usab kita tungod kay dili lang nga sila makatabang sa catechetical ministry kondili kita usab makatabang alang niining mga batan-on nga nagtinguha nga makahuman og kurso. Kini mao na gayud ang matag tuig nga programa sa atong Arkidioseses.