SJVTS nagsaulog sa ika-25 nga anibersaryo

Ni Mark Harvey Elloren

Gisaulog sa St. John Vianney Theological Seminary (SJVTS) ang ika-25 nga kasumaran sa pagkatukod niini. Ang kasaulogan gidungan sa tinuig nga Alumni Homecoming niadtong Augusto 23-25, 2010. Giaghat ni Obispo Antonio Ledesma ang 190 ka mga alumni nga niapil sa maong kasaulogan sa dakong pagpasalamat.

Sa 25 ka tuig, ang SJVTS nakapamunga ug 370 nga kaparian nga nag silbi sa nagkalain-lain nga diyosesis sa Mindanao ug Bohol. Saysentay sies nga  porsyento (66%) nga kaparian sa atong arkidiyosesis gikan sa maong seminaryo.

Sa unang gabii sa selebrasyon, si Rev. Fr. Celerino Reyes, SJ, ang bag-ong rector sa seminaryo, opisyal nga gidawat ang katungdanan isip rector ug nanaad sa sulod sa misa sa pag-atiman sa seminaryo. Ang installation gipangulohan ni Bp Ledesma uban sa tulo ka Obispo nga si Cardinal Gaudencio Rosales, Bp. Honesto Pacana, ug Bp. Jose Cabantan. Si Fr. Reyes inila na daan sa seminaryo tungod kay napili siya isip Vice-Rector niadtong 1991.

Sa unang higayon karong tuiga, ang seminaryo naghatag ug St. John Vianney Award (posthumously) sa tulo ka tawo  nga may dakong kalambigitan sa kinabuhi sa maong seminaryo. Ang mga awardees mao si Most Rev. Patrick Cronin, ang founder sa seminaryo; Rev. Fr. Giuseppe Raviolo, S.J., ang unang rector; ug si Madame Laureana Rosales, usa ka benefactor. Ang awards para kang Bp. Cronin gidawat ni Fr. Patrick O’Donoghue, Provincial Superior sa mga Columbans; kang Fr. Raviolo, si Rev. Fr. Jose Magadia, Provincial Superior sa Jesuits; ug kang Madame Rosales, si Mrs. Fe Juarez, iyang babaeng anak. Ang mga awardees natagaan usa ka estatuwa ni St. John Vianney nga gikulit ni Mr. Antonio Sescon, batikan nga mangungulit.

Paghuman sa awarding ceremony, gisunod dayon ang usa ka monologue nga gisulat ni Ameta Suarez-Tagochi, Palanca Awardee. Ang monologue kay pahinungod kang St. John Vianney, patron sa mga kura paroko. Gibidahan kini sa mga seminarista, mga formators ug mga seminary workers. Ang monologue kabahin sa pagkamaayo ni St. John Vianney ug kalabutan sa iyang kinabuhi sa atong modernong simbahan.

Sa ikaduhang adlaw, gipalawoman ang tema sa selebrasyon, “Rediscovering the essence of Ordained Priesthood through example of St. John Vianney,”  ni Most Rev. Gaudencio Rosales, Obispo sa Manila didto sa Grand Caprice Restaurant, Limketkai Center. Gitagaan niya ug pagpatin-aw ang tulo ka importante nga “klase sa hangin” nga maoy makatukmod sa parianong paglayag: mao ang Pulong sa Ginoo, ang Sakramento ug ang Gugma.

Si Bp. Jose Cabantan, Obispo sa Malaybalay ug usa ka alumnus sa seminaryo, gaingon sa iyang homiliya na angay ang alumni nga mga pari mobalik ug  magpasalamat sa seminaryo tungod kini nahimong “seedbed” sa ilang bokasyon. Si Bp. Cabantan, sa batch sa “Unang Bunga,” ang unang produkto nga nahimong Obispo sa seminaryo.

Sa iyang Rector’s time sa katapusang adlaw, si Fr. Celerino Reyes nagpahayag sa atubangan sa mga alumni na ang seminaryo nagkinahanglan ug P150 million nga Trust Fund para malungtaron ang pagpadagan niini. Sa kadugayon na sa seminaryo, may mga gambalay nga angay usbon. Nagplano usab ug pag-ayo sa library. Iyang sugyot sa mga alumni na unta makatigum ang usa ka batch ug P1 million para sa seminaryo. Mangita lang ang usa ka alumnus ug 50 ka pamilya sa ilang parokya nga makacontribute ug P1000 para makatigum ug P50,000. Kini dako na ug tabang sa kaugmaon sa seminaryo ug sa mga seminarista.

Ang SJVTS usa ka tunghaan sa teolohiya nga natukod niadtong 1985 una didto sa Manresa. Sa sunod tuig 1986 nabalhin kini sa Camaman-an, Cagayan de Oro City. Gitukod kini sa mga Obispo sa CABUSTAM uban sa giya sa mga Heswita nga maoy nagdumala sa seminaryo ug nagporma sa mga parionon nga nangalagad sa mga diyosesis sa Mindanao ug Bohol. Ang seminaryo gitukod alang tubag sa dinalian nga kinahanglanon sa  Mindanao sama sa “Interreligious Dialogue."

Karong tuiga may 80 ka seminarista ang SJVTS.