Tunghaan sa Arkidiyosesis migamit og stratehiya pagpataas sa motungha

Students doing research at Xavier Academy in Initao, one of the parochial schools under Archdiocesan supervision.

Ang Commission on Catholic Education sa Arkidiyosesis sa Cagayan de Oro mihan-ay ug mga bag-ong pamaagi aron pagsulbad sa nikunhod nga motungha sa mga parokyanong mga tulunghaan karong  tuig ting-eskuwela.

Sa usa ka pakighinabi, miasoy  si Rev. Fr. Rolando Gabutera, SSJV, ang  Superintendente sa Komisyon sukad pa niadtong 2008,  nga gawas sa preschools nga nakakuha og taas nga motungha, ang pagkunhod sa motungha sa tanang mga ang-ang naka apekto gayud og dako sa mga parokyanhong mga tulunghaan ubos sa iyang pamunoan.

Matud ni Fr. Gabutera,  ang usa ka dakong hinungdan sa pagkunhod sa motungha  karong tuiga mao ang pagsaka sa mga nagkalain-laing mga balayranon kon miscellaneous fees.  Midugang og sugid si Fr. Gabutera nga adunay nga dagkong parokyanhong tulunghaan dinhi sa atong Arkidiyosesis nga mikunhod gayud ang motungha bisan pa sa gihatag nga hinabang sa Department of Education aron mabuligan ang  mga ginikanan nga mahatagan ang  ilang mga anak og makadiyos nga edukasyon.

Kabahin niining gipatunhay nga mga kabag-ohan, adunay tulo ka mga pamaagi nga gipahimutang karon sa Komisyon  aron dili magpadayon ang pagkunhod sa motungha.  Usa niini mao ang pagpalit ug mga computers aron nga makapahigayon sila ug mga computer classes nga wala sa nga publiko nga tulunghaan.  Gihunahuna nga kini nga pamaagi makapataas sa motungha sa parokyanhong mga eskuwelahan.
Ang ikaduha nga pamaagi mao ang istrikto nga pagpatuman sa paggamit sa inandam na daan nga  talaan-panun-anan  sa tanang parokyanhong tulunghaan.  Kini sukwahi sa nabatasan na sa mga magtutudlo nga sila ang magbuot ug mag-andam sa ilang itudlo sa matag hilisgutan kon subject.  Kining ikaduha nga pamaagi gilantaw gihapon nga makataas sa kalidad sa edukasyon sa parokyanhong tulunghaan sa Arkidiyosesis.

Ang ikatulo nga pamaagi mao ang paghatag og dugang pagpahinungod sa makadiyos nga edukasyon nga maoy makahatag sa mga kabatan-onan og husto nga pag-umol  sa pagtuo og pamatasan.   “Ang atong tumong mao man ang pag-umol sa kinatibuk-ang  pagkatawo;  atong gilantaw ang pag-edukar sa hunahuna, sa kasingkasing ug sa pagpanginabuhi sa matag magtutuon,“  kini ang pamahayag ni Fr. Gabutera.  Tali niini, ang mga estudyante gi obligar nga moduyog sa mga makataong buluhatong-pagpakiglambigit ug sa  First Friday nga pagsaulog sa Eyukaristiya kon misa.

Gipangusgan ni Fr. Gabutera nga mapaabot ngadto sa mga ginikanan kini nga mga kabag-ohan.  “Buot natong malantaw sa  mga ginikanan nga husto ang ilang  pagdesisyon sa  pagpatungha sa ilang mga anak sa atong parokyanhong mga tulunghaan,”  pamahayag ni Fr. Gabutera.