Bag-ong diakono mangalagad sa Jolo

Rev. Ricky Bacolcol

Ni Mark Harvey Elloren

Si Sem. Ricky Bacolcol, 34, giordinahan pagka-diakono ni Most Rev. Fr. Angelito Lampon, O.M.I., D.D., Obispo sa Vicariate sa Jolo, didto sa San Nicolas de Tolentino Parish, Mambajao, Camiguin, niadtong Mayo 29, 2010. Siya sakop sa SAHA batch sa St. John Vianney Theological Seminary nga nigradwar  niadtong Marso 2010.

Si Ricky nga natawo sa Mambajao mibalhin sa Vicariate sa Jolo tungod kay nakita niya ang dakong panginahanglanon ug tawag sa pagkapari didto sa maong dapit apan buot gihapon niya maordinahan sa iyang yutang natawhan, ang Mambajao, Camiguin.

Sa homiliya ni Obispo Lampon, ang pagbalhin ni Ricky usa ka “risgo” tungod kay iyang gibiyaan ang  “comfort zones” diri sa Cagayan aron mangalagad sa lugar diin siya  gikinahanglan.
Sa 15 katuig niya sa pormasyon, nakaingon si Obispo Lampon nga si Ricky usa ka mapailubon nga tao. Sa kataas sa tuig nga iyang gitagana sa pormasyon siya nagpakita ug determinasyon ug wala nawad-an sa paglaum.

Si Ricky nisulod sa San Jose de Mindanao Seminary niadtong 1995. Nakahuman siya sa kurso nga Sociology sa Xavier University. Niadtong 2000, misulod siya sa St. John Vianney Theological Seminary. Unum katuig siya nagtudlo didto sa Jolo isip iyang Ministry Year.

Si Ricky maordinahan pagkapari sa Vicariate sa Jolo.