Archdiocesan Youth Day 2010 gipangandaman

Ang Archdiocesan Youth Apostolate (AYA) nangandam sa umaabot nga Archdiocesan Youth Day 2010 nga ipahigayon sa Holy Cross Parish, Alubijid, Misamis Oriental karong Oktubre 28-31, 2010.

Ang mosunod nga Youth Day opisyal nga gipadayag sa miaging Archdiocesan Youth Leaders and  Ministers Forum (AYLMF) sa parokya sa Immaculada Conception, Jasaan, Misamis Oriental niadtong Hulyo 17, 2010. Dunay 89 ka mga batan-ong lider nga gikan sa nagkalain-laing parokya sa  arkidiyosesis ang mitambong sa AYLMF.   Ang AYLMF usa ka panagtigum sa mga batan-ong lider sa Arkidiyoses matag tulo ka bulan sa tuig. Kining panagtigum usa ka oportunidad sa pag-umol sa mga batan-ong lider aron sila  maandam sa pagsagubang sa mga isyu nga giatubang sa mga batan-on. Panahon usab kini nga nagsandurotay ang mga batan-ong lider ug napaambit ang mga kalihukan nga nahitabo sa ilang tag-tagsa ka parokya.

Upat ka mga dugang pagtulon-an ang gihatag sa mga batan-ong lideres niadtong AYLMF: “Bulawanong Ako” nga gihatag ni Loyd Solana; “Clean, Peaceful and Honest Elections” ni  Hon. Bernabe Ely, Vice Mayor sa Manticao; “Me, Church, and the State” ni Carl Cabaraban; ug “My Commitment-my Renewal” ni Rev. Fr. Remel Mag-usara. Si Fr. Mag-usara, ang bag-ong Youth Director sa Arkidiyosesis nga nihulip kang Rev. Fr. Nathaniel Lerio  adtong Hunyo ni-ining tuiga maoy nangulo sa panagtigum. Gisugyot niya nga sa iyang pagdawat sa katungdanan, nanghinaut siya sa mga batan-on nga mutobo sila sa ilang panaad ug pagtugyan sa ilang kaugalingon sa pag-alagad sa Simbahan.

Sa wala pa mahuman ang AYLMF, gitugyan sa AYA ang pagdumala sa AYD cross sa Parish Youth Coordinating Council-PYCC sa Jasaan nga gipangulohan ni Carl Lloyd Salcedo, ang ilang PYCC Coodinator.  Ang PYCC-Jasaan maoy maghatud sa AYD cross didto sa Magsaysay, Misamis Oriental. Kini nga buluhaton usa ka tradisyon diin ang AYD cross mobisita sa tagsa-tagsa ka mga parokya sa dili pa magsugod ang AYD.   Ang Archdiocesan Youth Day usa ka panagtigum sa mga batan-on sa tanang parokya sa Arkidiyosesis aron mag-ampo, mamalandong, ug masandurotay. Kini mahitabo kausa sa duha ka tuig. Ang miaging AYD 2008 gipahigayon didto sa St. John Vianney Theological Seminary. Ang tanang mga batan-on gidapit sa pag-apil sa AYD 2010.